हिमाचलम् : ५५ लक्षाधिकाः मतदातार: पञ्जीकृताः, १०४८८२ नवीनाः पञ्जीकृताः-निर्वाचनविभाग:

हिमाचलम् : ५५ लक्षाधिकाः मतदातार: पञ्जीकृताः, १०४८८२ नवीनाः पञ्जीकृताः-निर्वाचनविभाग:
हिमसंस्कृतवार्ता- शिमला। हिमाचलप्रदेशे भावचित्रमतदातृसूचौ ५५,५६,००१ मतदातार: पञ्जीकृताः सन्ति । अत्र २८,०७,३८७ पुरुषाः, २७,४८,५७८ महिलाः, ३६ तृतीयलिङ्गिन: च सन्ति । एतदतिरिक्तं २५ प्रवासी मतदातारः अपि अत्र समाविष्टाः सन्ति । १८ तः १९ पर्यन्तं आयुवर्गस्य ४८,१८३ नवीनमतदातृणां नाम मतदातृसूचौ पञ्जीकृतम्। सुलह-क्षेत्रे अधिकतमं १,०४,६१२ मतदातारः, न्यूनतमं २५,०४३ मतदातार: लाहौल-स्पीति-विधानसभाक्षेत्रे सन्ति। मुख्यनिर्वाचनपदाधिकारी मनीषगर्गः अवदत् यत् भारतस्य निर्वाचन-आयोगेन अनुमोदितस्य समयसूचनानुसारं भावचित्रमतदातृसूचौ विशेषसारांशपुनरीक्षणस्य कार्यं २०२४ जनवरी १ दिनाङ्के सम्पन्नम् अस्ति। राज्ये ५४,९७,२१६ मतदातॄणां नामानि पञ्जीकृतानि।
पुनरीक्षणकाले १,०४,८८२ नूतनाः मतदातारः पञ्जीकृताः । एतदतिरिक्तं मृत्योः, स्थानपरिवर्तनस्य, द्विगुणपञ्जीकरणस्य च कारणेन मतदातासूचिकातः ४६,०९७ मतदातॄणां नामानि निष्कासितानि सन्ति । प्रकाशिता: मतदातृसूचय: जिला निर्वाचनकार्यालयेषु, निर्वाचन पञ्जीकरण-अधिकारी (एडीएम तथा एसडीएम), सहायक-निर्वाचन- पञ्जीकरण-अधिकारी (तहसीलदार तथा नायब तहसीलदार) इत्येतेषां कार्यालयेषु अपि च प्रत्येकं मतदानकेन्द्रषु मतदानकेन्द्रस्तरस्य अधिकारीणां पार्श्वे च निरीक्षणाय उपलब्धा: सन्ति। एतस्य अतिरिक्तं निर्वाचनविभागस्य जालपुटे http://ceohimachal.nic.in इत्यत्र तथा मतदातापटले मतदातासूचिकाः अपि उपलभ्यन्ते। मुख्यनिर्वाचनाधिकारी मनीषगर्गः निर्वाचनविभागस्य मुख्यालये राजनैतिकदलानां प्रतिनिधिभिः सह मिलित्वा अन्ततः प्रकाशितानां भावचित्ररहितमतदाता-सूचीनां पीडीएफ स्मृतिश्लाकाद्वारा (पेनड्राइवद्वारा) दत्तवान्।