नोएडा-ग्रेटरनोएडा-नगरयोः मध्ये ‘एक्वा लाईन’ मेट्रो-परियोजनायाः विस्ताराय केन्द्रीयमन्त्रिमण्डलस्य स्वीकृतिः

नोएडा-ग्रेटरनोएडा-नगरयोः मध्ये ‘एक्वा लाईन’ मेट्रो-परियोजनायाः विस्ताराय केन्द्रीयमन्त्रिमण्डलस्य स्वीकृतिः
नवदेहलीनोएडा-ग्रेटरनोएडा-नगरयोः मध्ये मेट्रो-सम्पर्कं (कनेक्टिविटी) वर्धयितुं महत्त्वपूर्णं निर्णयं स्वीकुर्वता केन्द्रसर्वकारेण नोएडा-मेट्रो-रेल-परियोजनायाः ‘एक्वा लाईन’ इत्यस्याः विस्ताराय स्वीकृतिः प्रदत्ता अस्ति। प्रधानमन्त्रिणः श्रीनरेन्द्रमोदीमहोदयस्य अध्यक्षतायां बुधवासरे अत्र सम्पन्नायां केन्द्रीयमन्त्रिमण्डलस्य उपवेशने एतत्सम्बद्धाय प्रस्तावाय अनुमोदनं प्रदत्तम्।उपवेशनानन्तरं सूचना-प्रसारणमन्त्रिणा श्रीअश्विनीवैष्णवमहोदयेन संवाददाता-सम्मेलने सूचितं यत् मन्त्रिमण्डलस्य अस्य निर्णयस्य अन्तर्गतं नोएडा सेक्टर-५१ तः ग्रेटर नोएडा सेक्टर-०४ पर्यन्तम् ८.४४९ किलोमीटर-परिमितः दीर्घः नूतनः मेट्रो-मार्गः (कॉरिडोर) निर्मास्यते। तेन उक्तं यत् इयं परियोजना चतुर्षु वर्षेषु पूर्णा भविष्यति। अस्मिन् मार्गे ०५ उत्थापित-स्थानकानि (एलिवेटेड स्टेशन) भविष्यन्ति। अस्य मार्गस्य आरम्भानन्तरं नोएडा-ग्रेटरनोएडा-नगरयोः सक्रिय-मेट्रो-जालस्य कुलदैर्घ्यं वर्धित्वा ७१.८७८ किलोमीटर-परिमितं भविष्यति।
प्रधानमन्त्रिणः सन्देशः –
प्रधानमन्त्रिणा श्रीनरेन्द्रमोदीमहोदयेन अनन्तरं सामाजिकमाध्यमे (सोशल मीडिया) एकस्मिन् सन्देशे उक्तं यत्, “यथा-यथा नोएडा-ग्रेटरनोएडा-नगरयोः विकासः भवति, तर्हि जनानां प्रतिदिनस्य आवागमनं दीर्घं किमर्थं भवेत्? नोएडा-ग्रेटरनोएडा-नगरयोः निवासिकृते एषः शुभसमाचारः अस्ति यत् मन्त्रिमण्डलेन ‘एक्वा लाईन’ मेट्रो-मार्गस्य विस्ताराय स्वीकृतिः प्रदत्ता अस्ति।”
प्रमुखाः लाभाः –
सुगमः सम्पर्कः: कार्यालयान्, विद्यालयान्, चिकित्सालयान् व्यावसायिककेन्द्राणि च प्राप्तुं सौकर्यं भविष्यति।
यातायात-नियन्त्रणम्: मार्गेषु यातायातस्य सम्मर्दे (भीड़भाड़) न्यूनता आगमिष्यति।
समयस्य रक्षणम्: जनानाम् आवागमने व्यतीतस्य समयस्य न्यूनता भविष्यति।
निश्चितरूपेण इयं परियोजना सम्पर्कसुविधां वर्धयितुं जनजीवनं च अधिकं सुगमं कर्तुं दिशि एकं महत्त्वपूर्णं पदम् अस्ति।