Gaggal Airport – तन्त्वारोपणाय (तारबन्दीकरणाय) १.१६ कोटिरूप्यकाणि विमुक्तानि, गगल-विमानपत्तन-विस्तारः प्राप्तवान् गतिम्, लोकनिर्माणविभागः करिष्यति कार्यम्
हिमसंस्कृतवार्ता — काङ्गड़ा।
हिमाचलप्रदेशस्य बहुप्रतीक्षितस्य काङ्गड़ा-विमानपत्तनस्य (गगल-विमानपत्तनस्य) विस्तारप्रक्रिया अधुना धरातले तीव्रा जाता। प्रदेशसर्वकारेण अस्याः महत्त्वपूर्णपरियोजनायाः अग्रेसरणाय अधिगृहीतां भूमिं सुरक्षितां विधातुं १ कोटिः १६ लक्षं रूप्यकाणां (१.१६ कोटिः) धनराशिः विमुक्ता। एषा राशिः पर्यटनविभागाय समर्पिता, यतः परम् अधुना लोकनिर्माणविभागेन सीमारक्षायाः तन्त्वारोपणस्य च कार्यं प्रारभ्यते।
तत्रैव, अस्याः महत्ताकांक्षि-परियोजनायाः प्रमुखप्राविधिकपक्षेण ‘मांझी-खड्ड’ (मांझी-प्रवाहिका) इत्यस्योपरि प्रस्तावितस्य धावनमार्ग-सेतोः औन्नत्यविषयेऽपि शीघ्रमेव अन्तिमनिर्णयस्य सम्भावना वर्तते। तन्त्वारोपणेन न केवलं भूमिः सुरक्षिता स्थास्यति, अपि तु अग्रे संरचनागत-निर्माणकार्येभ्यः एकं सुव्यवस्थितं क्षेत्रं सज्जीभविष्यति। लोकनिर्माणविभागः शीघ्रमेव औपचारिकताः पूरयित्वा कार्यम् आरप्स्यते।
धावनमार्ग-सेतोः औन्नत्ये संशयस्य अन्तः भविष्यति
विमानपत्तनविस्तारस्य सर्वाधिकं जटिलं कार्यं ‘मांझी-खड्ड’-उपरि निर्मीयमाणः धावनमार्ग-सेतुः अस्ति। ज्ञायते यत् सेतोः औन्नत्यं तस्य संरचनां च अधिकृत्य प्राविधिकसमीक्षा अन्तिमचरणे वर्तते, समीक्षा-विवरणं (Review Report) च शीघ्रमेव सर्वकाराय समर्पयिष्यते। अस्य विवरणस्य निष्कर्षाधारेण एव सेतोः अन्तिमम् औन्नत्यं निर्णेष्यते। अयमेव निर्णयः निर्धारयिष्यति यत् परियोजनायाः अस्य महत्त्वपूर्णस्य प्राविधिकचरणस्य कार्यं केन आकल्पेन अग्रे प्रसारयिष्यते।
पर्यटनस्य संवर्धनम्
प्रदेशस्य महत्त्वाकांक्षिणी परियोजना काङ्गड़ा-विमानपत्तनस्य विस्तारः न केवलं काङ्गड़ा-क्षेत्रस्य, अपि तु समग्रस्य हिमाचलप्रदेशस्य पर्यटनाय अर्थव्यवस्थायाश्च कृते युगपरिवर्तकः (Game changer) मन्यते। अस्य विस्तारेण धर्मशालां, मैक्लोडगञ्जं च अन्यानि पर्यटनस्थलानि प्रति देश-विदेशानां पर्यटकानां सम्प्राप्तिः सुगमा भविष्यति।
