स्पीति-क्षेत्रस्य विकासाय पञ्चशतकोटि-रूप्यकाणि व्ययीभविष्यन्ति, पञ्चांश-न्यूने तापे भूमौ उपविश्य मुख्यमन्त्रिणा सुक्खू-महोदयेन श्रुताः समस्याः
हिमसंस्कृतवार्ता — काजा (लाहौल-स्पीति)।
स्पीति-उपत्यकायां पञ्चांश-न्यूने (–५° सेल्शियस्) तापे रात्रौ प्रायः नववादने मञ्जुश्री-स्थानं प्राप्य मुख्यमन्त्री सुखविन्दरसिंहसुक्खू-महोदयः स्थानीयजनैः सह संवादम् अकरोत्। सः भूमौ उपविश्य प्रायः सार्धैकघण्टां यावत् जनानां समस्याः शृण्वन् आसीत्। अस्मिन् अवसरे सः स्थानीयवेशभूषायां पारम्परिकनृत्येषु अपि सम्मिलितः जातः। वार्तालापस्य मध्ये एका बालिका मुख्यमन्त्रिणः अङ्के (उत्सङ्गे) सुप्ता, यस्याः चित्रं सामाजिकमाध्यमेषु अत्यधिकं प्रसारितं भवति। मुख्यमन्त्रिणा द्विदिनात्मकस्य काजा-प्रवासस्य समये आगामिकालखण्डे स्पीति-क्षेत्रस्य विकासाय पञ्चशतकोटि-रूप्यकाणां (₹५०० कोटिः) व्ययस्य घोषणा कृता। तेन ११६.२८ कोटिरूप्यकाणां विविधानां विकासपरियोजनानां लोकार्पणादिकं शिलान्यासश्च कृतः।
रङ्गरीक्-स्थाने कृतः रात्रिप्रवासः
‘सर्वकारः ग्रामस्य द्वारे’ (सरकार गांव के द्वार) इति कार्यक्रमान्तर्गततया रङ्गरीक्-स्थाने रात्रिप्रवासस्य समये मञ्जुश्री-स्थाने जनानां समस्याः श्रुत्वा अधिकारिभ्यः समाधानस्य निर्देशाः प्रदत्ताः। मुख्यमन्त्रिणा रोङ्गटोङ्ग-स्थाने घटिकासञ्चयप्रणाल्या सञ्चालितस्य प्रदेशस्य प्रथमस्य सौर-ऊर्जा-संयन्त्रस्य लोकार्पणं कृतम्। अनेन प्रतिवर्षं प्रायः षट्त्रिंशल्लक्षं (३६ लक्षं) यू्निट्-विद्युदुत्पादनस्य सम्भावना वर्तते। समदो-काजा-स्थानयोः ४७.९५ कोटिरूप्यकाणां व्ययेन निर्मीयमाणयोः ६६/२२ किलोवोल्ट्-विद्युदुपकेन्द्रयोः आधारशिला स्थापिता। समदो-काजा-सञ्चरणमार्गस्य निर्माणे प्रायः ३५० कोटिरूप्यकाणि व्ययीभविष्यन्ति, अस्य च वर्षत्रये समापनस्य लक्ष्यं निर्धारितम् अस्ति।
स्पीति-क्षेत्रस्य विद्युत्समस्यायाः स्थायीसमाधानं विधास्यते : मुख्यमन्त्री
मुख्यमन्त्रिणा उक्तं यत् स्पीति-क्षेत्रस्य विद्युत्समस्यायाः स्थायीसमाधानं विधास्यते। कुञ्जुम्-गिरिद्वारस्य (दर्रे) अधः आन्तर्भौमिकमार्गस्य निर्माणाय सर्वेक्षणस्य विस्तृतपरियोजनाप्रतिवेदनस्य (DPR) च निर्माणाय घोषणा कृता। काजा-स्थाने हेलीपोर्ट्-निर्माणाय अपि सर्वेक्षणं विधास्यते। स्पीति-उपत्यकां प्राकृतिककृषिक्षेत्रत्वेन उद्घोषयितुमपि सङ्कल्पः कृतः। मुख्यमन्त्री रङ्गरीक्-स्वास्थ्य-उपकेन्द्रं प्राथमिकस्वास्थ्यकेन्द्ररूपेण स्तरोन्नयनं विधातुं बालिकाछात्रावासस्य निर्माणाय च द्विकोटिरूप्यकाणां राशिं दातुं घोषितवान्। काजा-चिकित्सालये स्त्रीरोगविशेषज्ञस्य औषधिविशेषज्ञस्य (Medicine Specialist) च चिकित्सकानां नियुक्तिः अपि शीघ्रमेव क्रियते।
अग्रिमशैक्षणिकसत्रात् नैतिकशिक्षायाः आरम्भाय वक्तव्यम्
काजा-स्थिते सीबीएसई-विद्यालये छात्रैः सह संवादकाले सः आगमिशैक्षणिकसत्रात् नैतिकशिक्षायाः प्रारम्भाय अकथयत्। अस्य कृते पाठ्यचर्या सज्जीक्रियमाणा वर्तते। पाठ्यक्रमे पर्यावरण-अध्ययनस्य समावेशाय प्रदत्तस्य परामर्शस्य तेन प्रशंसा कृता। काजा-स्थाने महाविद्यालयस्योद्घाटनस्य सम्भावनानाम् अन्वेषणं, छात्रेभ्यः विशेषप्रशिक्षणम् (Coaching), कौशलप्रशिक्षणपाठ्यक्रमाणां प्रारम्भः तथा पर्यटनसम्बद्धप्रशिक्षणस्य विषये विचारं कर्तुमपि आश्वासनं दत्तम्।
