चालानस्य स्थाने एव ‘रियल-टाइम’-अङ्कीय-भुक्ति:, ‘एचआरटीसी’-संस्थायै लप्स्यन्ते १५०० विद्युत्-बस-यानानि — मुख्यमन्त्री सुक्खू
हिमसंस्कृतवार्ता — शिमला।
हिमाचलप्रदेशस्य मुख्यमन्त्री सुखविन्दरसिंहसुक्खू-महोदयः बुधवासरे ‘चालान-टू-पे’ (Challan to Pay) इति अभिनव-उपक्रमस्य उद्घाटनम् अकरोत्। अस्याः व्यवस्थायाः अन्तर्गतं साम्प्रतं जनाः घटना-स्थले एव दण्ड-शुल्कस्य (चालान) सुरक्षितं, सुलभं, तत्कालिकी च अङ्कीय-भुक्ति: (Digital Payment) कर्तुं शक्ष्यन्ति। अनेन सौविध्येन जनैः सर्वकारीय-कार्यालयेषु भ्रमणस्य आवश्यकता न भविष्यति, अपि तु यत्र चालानं निर्गतं तत्रैव अङ्कीय-माध्यमेन तत्-धनं दातुं शक्यते।
परिवहन-विभागस्य अधिकारिभ्यः ‘एक्सिस-वित्तकोषेण’ पीओएस-यन्त्राणि वितरितानि सन्ति। अस्य उपक्रमस्य मुख्यम् उद्देश्यं न केवलं भुक्ति-सरलीकरणम्, अपितु सङ्गृहीत-धने पारदर्शकतायाः उत्तरदायित्वस्य च दृढीकरणम् अस्ति। प्रत्येकस्य व्यवहारस्य सङ्गणकीय-अभिलेखः स्थापयिष्यते तथा च राशिः साक्षात् राज्य-कोषे निक्षेप्स्यते। अनेन नकद-व्यवहारस्य ह्रासेन सह राजस्व-ह्रासस्य आशङ्का अपि नङ्क्ष्यति।
एचआरटीसी-संस्थायै १५०० नूतनानि विद्युत्-बस-यानानि; हरित-उदजन-वाहनानां क्रयणम्
हिमाचल-पथ-परिवहन-निगमस्य (HRTC) समीक्षा-गोष्ठ्यां मुख्यमन्त्रिणा उद्घोषितं यत् राज्य-सर्वकारेण आगामि-काले निगमाय १,५०० नूतनानि विद्युत्-बस-यानानि प्रदास्यन्ते। तेन निर्दिष्टाः अधिकारिणः यत् एतेषां नूतन-वाहनानां न्यूनतमा धावन-क्षमता ३५० किलोमीटर-परिमितिः भवेत्, यानि हिमाचलस्य पार्वत्य-विषम-भौगोलिक-परिस्थितिषु सञ्चालन-योग्यानि स्युः।
सः अवदत् यत् निगमाय पूर्वमेव २९७ विद्युत्-यानानि प्रदत्तानि सन्ति, निगमस्य आत्मनिर्भरतां वर्धयितुं संख्यायाम् अस्यां वृद्धिः क्रियते। सर्वकारेण हरित-ऊर्जा-प्रोत्साहनाय १०० हरित-उदजन-बस-यानानि (Green Hydrogen Buses) तथा च १०० महा-भव्य-बस-यानानि (Super Deluxe Buses) अपि क्रेष्यन्ते।
विद्युद्-आधान-संरचनायाः द्रुत-विकासः
मुख्यमन्त्रिणा समग्रे राज्ये विद्युद्-आधान-केन्द्राणां (E-Charging Infrastructure) निर्माण-कार्ये शीघ्रताम् आनेतुं निर्देशाः दत्ताः। सहैव एचआरटीसी-अधिकारिभ्यः ३० विद्युत्-वाहनानि दीयन्ते। ऊना-मण्डले नालागढ-स्थे च क्षेत्रीय-प्रबन्धक-कार्यालये सर्वाणि वाहनानि केवलं विद्युत्-चालितानि भवेयुः इति तेन आदिष्टम्।
राजस्व-वृद्धेः उल्लेखं कुर्वन् सुक्खू-महोदयः अवदत् यत् परिवहन-विभागस्य राजस्वं वर्ष-२०२१-२२ तमे ५१० कोटि-रूप्यकाणि आसीत्, यत् वर्ष-२०२५-२६ पर्यन्तं प्रवर्ध्य ९९५ कोटि-रूप्यकाणि सञ्जातम्। सः विभागे रिक्तानां पदानां पूरणाय सर्वकार-पक्षतः पूर्ण-सहयोगस्य आश्वासनं दत्तवान्।
विद्युत्-बस-यानेभ्यः प्रति-किलोमीटरं १८.१९ रूप्यकाणां लाभः — उप-मुख्यमन्त्री मुकेश-अग्निहोत्री
अस्मिन् उपवेशने उप-मुख्यमन्त्री मुकेश-अग्निहोत्री-महोदयः प्रावोचत् यत् हिमाचल-पथ-परिवहन-निगमः (HRTC) राज्यस्य ‘जीवन-रेखा’ वर्तते, यः अति-दुर्गम-क्षेत्रेषु अपि जन-सामान्यं परिवहन-सेवाः प्रयच्छति। सः अवदत् यत् विद्युत्-वाहनानां सञ्चालनं पर्यावरण-संरक्षणाय महनीयं पदं वर्तते तथा च अनेन निगमस्य आर्थिक-सञ्चयः अपि सुदृढः जायते। विद्युत्-बस-यानानां सञ्चालनेन प्रति-किलोमीटरं निगमस्य १८.१९ रूप्यकाणां रक्षणं भवति।
अस्यां समीक्षा-गोष्ठ्यां अतिरिक्त-मुख्य-सचिवः ओङ्कारचन्द-शर्मा, परिवहन-निदेशकः नीरज-कुमारः, एचआरटीसी-प्रबन्ध-निदेशकः शिवमप्रताप-सिंहः, एक्सिस-बैंक-राज्य-प्रमुखः वरुण-शर्मा अन्याश्च वरिष्ठाधिकारिणः उपस्थिताः आसन्।
