लोक मते ( कविता )
घा पुर मिर्चां लाणे आले लोक मते ।
झूठे गीत सुणाणे आले लोक मते ।।
जेकर मुखिया घरे दा हक्खी मिट्टी लै ।
टब्बर कुरस्ते पाणे आले लोक मते ।।
जेकर तेरयां शब्दां बिच्च है दम मितरा ।
सदियां साथ पुगाणे आले लोक मते ।।
मत सोच के पहाड़ी मुकणा लग्गी है ।
घर घर पहाड़ी गलाणे आले लोक मते ।।
जां तक पहाड़ ने जिन्दा तां तक पहाड़ी बी ।
बेशक झूठ डराणे आले लोक मते ।।
अपणी भाषा बोल्ला अपणी शान बधा ।
बेशक गिटपिट लाणे आले लोक मते ।।
करदा रहकर दर्दा खेती फुल्लां दी ।
बेशक कंडे राहणे आले लोक मते ।।
मेरियां गला कन्ने गजूली लग्गे तां ।
ठंडा न्हौण नुहाणे आले लोक मते ।।
अशोक दर्द
गांव घाट डाकघर शेरपुर तहसील डलहौजी जिला चंबा हिमाचल प्रदेश पिन 176306
