संसदसत्रम्- परीक्षा-अनाचार-रोधनार्थं कठोर-विधेयकस्य मन्त्रिमण्डलेन स्वीकृतिः

परीक्षा-अनाचार-रोधनार्थं कठोर-विधेयकस्य मन्त्रिमण्डलेन स्वीकृतिः
केन्द्रीय-मन्त्रिमण्डलेन प्रश्नपत्र-गोप्यताभंग अथ परीक्षा-अनाचार प्रकरणानां द्रुत-न्यायालयानां संस्थापनाय सहैव कठोर दण्डस्य विधानाय एकस्य प्रारूप-विधेयकस्य स्वीकृतिः प्रदत्ता। संसद् भवने प्रधानमन्त्रिणः नरेन्द्र मोदिनः अध्यक्षतायां सम्पन्ने मन्त्रिमण्डलीयोपवेशने अस्य प्रारूप-विधेयकस्य अनुमोदनं कृतम्।
कर्णाटक-आन्ध्र-प्रदेशयोः मध्ये बल्लारी-गुन्तकल-रेल-परियोजनाय अनुमोदनम्
केन्द्रीय-मन्त्रिमण्डलस्य आर्थिक कार्य-समित्या कर्णाटक-आन्ध्रप्रदेश राज्ययोः मध्ये स्थितस्य बल्लारी-गुन्तकल-रेल-खण्डस्य-रेल-पथ-पड्क्तेः निर्माण-प्रस्तावाय स्वीकृतिः प्रख्यापिता। अद्य अपराह्णे नवदेहल्यां प्रसारमाध्यमान् सम्बोधयन् सूचना-तथा-प्रसारण-मन्त्री अश्विनी वैष्णवः अब्रवीत् यत् एषा परियोजना आन्ध्रप्रदेश-कर्णाटक-राज्ययोः मध्ये गमनागमन-सम्पर्क भृशं द्रढयिष्यते। एषा कार्य-योजना ‘प्रधानमन्त्री-गतिशक्ति-राष्ट्रिय-महा-योजनायाः’ आधारेण परिकल्पिता अस्ति, यस्याः मुख्यं लक्ष्यम् तावत् एकीकृत-नियोजनेन तथा हितधारकाणां परामर्शः बहु-माध्यमिक सम्पर्कस्य अथ संभार-दक्षतायाः समभिवृद्धिः अस्ति। एषा परियोजना कर्णाटक-आन्ध्रप्रदेशयोः त्रिणि जनपदानि व्याप्नोति। अस्य बहु-मार्ग निर्माणस्य प्रभावेन प्रायः सप्त-लक्ष-जनसङ्ख्या-युक्तानाम् नवनवति ग्रामाणां सम्पर्क-सुविधा अत्यन्तं सुगमा भविष्यति ।
नीट-प्रश्नपत्र-गोप्यता-विषये नड्डा-जितेन्द्र-सिंहयोः सी.जे.पी-प्रतिनिधिमण्डलेन सह चर्चा
केन्द्रीय-मन्त्री जे.पी. नड्डा डॉ. जितेन्द्र सिंहः चेत्येतौ नवदिल्ली-नगरे सी.जे.पी प्रतिनिधिमण्डलेन सह अमिलताम्। सम्मेलनात् परं वार्ताहरैः सह भाषमाणः श्रीनड्डा अवदत् यत्, उपवेशन-काले तैः परीक्षा प्रणाल्यां परिष्काराणां विषये तैः सी.जे.पी-प्रतिनिधिमण्डलस्य याचनाः धैर्यपूर्वकं श्रुताः, श्रीनड्डा अवोचत् यत् प्रतिनिधिमण्डलेन तिस्रः मुख्याः याचनाः उपस्थापिताः सहैव प्रश्नपत्र-गोप्यता-प्रकटनस्य रोधनाय केचन उपायाः अपि प्रतिपादिताः। केन्द्रीय मन्त्री समेधितवान् यत् सर्वकारः श्वः प्रतिनिधिमण्डलेन सह पुनः द्वितीय चरणस्य वार्ता करिष्यति ।
नीटप्रकरणे कोलाहलेन संसद्-कार्याचरणं सोमवासरं यावत् स्थगितम्
नीट्-प्रश्नपत्र-गोप्यताभङ्‌गे सहैव छात्राणां विरोध-प्रदर्शनमधिकृत्य अद्य पञ्चम-दिनेऽपि संसदि अविरत-कोलाहलेन उभयोः सदनयोः कार्याचरणं सोमवासरं यावत् स्थगितम् । अपराह्णे द्विवादने द्वितीय-स्थगनात् परं यदा राज्यसभा समवेता, तदा गृह-राज्यमन्त्रिणा नित्यानन्द-रॉयेन षड्विंशत्यधिक‌द्विसहस्रतमस्य राष्ट्रीय-गौरव-अपमान-निवारण-विधेयकम् उपस्थापितम्। एतत् विधेयकं एकसप्तत्यधिक-एकोनविंशतितमस्य अधिनियमस्य संशोधनार्थम् वर्तते । विधेयकस्य उपस्थापनात् परं विपक्षिणः नीट्-प्रकरणमादाय उच्चैः विरोधो‌द्घोषान् प्रारभन्त। एतस्य कोलाहलस्य मध्ये उपसभापतिः हरिवंशः सदनस्य कार्याचरणं सोमवासरं यावत् अस्थगयत्। इतः पूर्व प्रातः एकादशवादने यदा राज्यसभायाः कार्याचरणम् आरब्धं तदा सदनं कारगिल-युद्धस्य हुतात्मवीरेभ्यः श्रद्धाञ्जलिं प्रादात्। सभापतिः सी.पी. राधाकृष्णन् प्रावोचत् यत्, कारगिल-विजय-दिवसः नवनवत्यधिक एकोनविंशतितमस्य कारगिल-युद्धे भारतस्य विजयस्य स्मारकं वर्तते। उच्चसदने हुतात्मवीराणां स्मृतौ मौनमपि सन्धृतम्। अपरत्र नीट्-विषये छात्राणां प्रदर्शनं चाधिकृत्य विपक्षस्य विरोधेन लोकसभायाः कार्याचरणमपि सोमवासरं यावत् अपवारितम्। मध्याह्ने द्वादशवादने प्रथमस्थगनात् परं यदा सदनं समवेतम्, तदा संसदीय कार्यमन्त्री किरेन रिजिजुः न्यगादीत् यत् सर्वकारः प्रथम-दिनादेव नीट्-विषये चर्चायै सन्नद्धः । सः प्रावोचत् यत् कांग्रेस-दलेन नूतन-पक्षाश्रयानारोप्य चर्चायां विघ्नः उत्पाद्यते। मन्त्री गदितवान् यत् प्रधानमन्त्री नरेन्द्रमोदी देशम् आश्वस्तवान् यत् अस्मिन् विषये कठोरविधिः आनेष्यते। श्रीरिजिजुः विपक्षनेतारं राहुल-गान्धिनं न्यवेदयत् यत् सः स्व-संसदीय सहयोगिनां मार्गदर्शनं कुर्यात्, येन सदनस्य सञ्चालनं सुचारु रूपेण भवेत् । पीठासीनः अधिकारी जगदम्बिका पालः अवदत् यत् सर्वकारः चर्चायै प्रस्तुतः, विपक्षेण च सहयोगः विधातव्यः। अत्रापि अश्रान्त-कोलाहलेन सदनं सोमवार यावत् निवारितम् । इतः प्राक् प्रातः एकादशवादने यदा लोकसभायाः कार्माचरणम् आरब्धं, तदा सदने कारगिल-युद्ध सर्वोच्च-बलिदानं दत्तवद्भ्यः भारतीय सशस्त्र सेनायाः हुतात्मवीरेभ्यः श्रद्धाञ्जलिः अर्पितः तेषां स्मृतौ च मौनं चापि अवधारितम् ।