ओडिशाराज्ये विश्वप्रसिद्धा भगवतः जगन्नाथस्य रथयात्रा आध्यात्मिकोत्साहेन समारब्धा

ओडिशाराज्ये विश्वप्रसिद्धा भगवतः जगन्नाथस्य रथयात्रा आध्यात्मिकोत्साहेन समारब्धा
हिमसंस्कृतवार्ता। ओडिशाराज्यस्य पवित्रायां पुरी-नगर्यां उत्कृष्टाध्यात्मिकोत्साहः वरीवर्ति । विश्वप्रसिद्धा भगवतः जगन्नाथस्य रथयात्रा धार्मिक-विधि-विधानैः अभूतपूर्व-सुरक्षा प्रबन्धैः च सह महता आध्यात्मिकोत्साहेन समारब्धा । गतप्रातःकालादेव तीर्थ-नगर्यां निरन्तरं जायमानां वृष्टिमतीत्य, लक्षाधिकाः श्रद्धालवः अविचलित-श्रद्धया मुख्यमार्गे एतत् पवित्रं दृश्यं साक्षात्कर्तुं उपस्थिताः । जय जगन्नाथ इत्याख्यैः गगनभेदी-जयघोषैः सह भगवान् जगन्नाथः, भगवान् बलभद्रः, देवी सुभद्रा, भगवान् सुदर्शनश्च पूर्ण-विध्यनुसारं स्व-स्व-रथेषु विराजिताः, अनेनैव सह पारम्परिकः पहाण्डी-बिजे इत्ययं कार्यक्रमः सम्पन्नः। अस्य विश्वप्रसिद्ध-महोत्सवस्य सुचारु-सुरक्षित-सञ्चालनाय सार्वत्रिकी सुरक्षा-व्यवस्था, जन-सम्मर्द-प्रबन्धनं सहैव आपत्कालीन-सज्जाः पूर्णरूपेण विहिताः ।
द्रौपदीमुर्मुः उपराष्ट्रपतिः सी. पी. राधाकृष्णन्, प्रधानमन्त्री नरेन्द्र-मोदी च देशवासिभ्यः हार्दान् शुभाशयान् प्रकटितवन्तः
हिमसंस्कृतवार्ता।ओडिशाराज्यस्य पुरी-नगरे भगवतः जगन्नाथस्य पावनी रथयात्रा समाचर्यते। अस्मिन् पुण्यावसरे राष्ट्रपतिपदासीना द्रौपदीमुर्मुः उपराष्ट्रपतिः सी. पी. राधाकृष्णन्, प्रधानमन्त्री नरेन्द्र-मोदी च देशवासिभ्यः हार्दान् शुभाशयान् प्रकटितवन्तः। अवसरेऽस्मिन् एकस्मिन् सन्देशे राष्ट्रपति-महोदया स्वबाल्यकालस्य संस्मरणानि प्रस्तुतवती । उपराष्ट्रपतिना प्रतिपादितं यत्, इयं पावन-रथयात्रा श्रद्धा-भक्ति-समानता-सामूहिक सद्भावानां मूल्यानि प्रदर्शयति । प्रधानमन्त्रिणा नरेन्द्रमोदिनापि अवसरेऽस्मिन् निगदितं यत् इयं रथयात्रा देशस्य शाश्वत-आध्यात्मिक-सांस्कृतिक-न्यायसस्य कश्चन प्रकाशमानः चिह्नो वर्तते ।