विश्वपर्यावरणदिवसस्य पूर्वसन्ध्यायां ‘संस्कृतवाङ्मये पर्यावरणचिन्तनम्’ इति विषये राष्ट्रियसङ्गोष्ठ्याः आयोजनम्

विश्वपर्यावरणदिवसस्य पूर्वसन्ध्यायां ‘संस्कृतवाङ्मये पर्यावरणचिन्तनम्’ इति विषये राष्ट्रियसङ्गोष्ठ्याः आयोजनम्
विश्वमोहनझा, दरभङ्गा, २ जूनमासः।
ललितनारायणमिथिलाविश्वविद्यालयस्य स्नातकोत्तर-संस्कृतविभागस्य तथा च डॉ. प्रभातदास-फाउण्डेशन-इत्यस्य संयुक्ततत्वावधाने विश्वपर्यावरणदिवसस्य पूर्वसन्ध्यायाम् आगामी-जूनमासस्य ४ दिनाङ्के पूर्वाह्णे सार्ध-एकादशवादने (11:30) एका राष्ट्रियसङ्गोष्ठी आयोजयिष्यते।
इयं सङ्गोष्ठी “संस्कृतवाङ्मये पर्यावरणचिन्तनम्” इति मुख्यविषये स्नातकोत्तर-संस्कृतविभागे प्रचल्यति। अस्मिन् कार्यक्रमे मुख्यवक्तृरूपेण कामेश्वरसिंहदरभङ्गासंस्कृतविश्वविद्यालयस्य स्नातकोत्तर-वेदविभागस्य पूर्वप्रमुखाः डॉ. विनयकुमारमिश्रमहोद्याः उपस्थास्यन्ति।
आयोजकैः ज्ञापितं यत् अस्यां सङ्गोष्ठ्यां कस्यापि विषयस्य शिक्षकाः, शोधार्थिनः, छात्राश्च निःशुल्करूपेण भागं ग्रहीतुं शक्नुवन्ति। कार्यक्रमस्यास्य मुख्यमुद्देश्यं संस्कृतसाहित्ये निहितस्य पर्यावरणीयचिन्तनस्य तस्य आधुनिकसन्दर्भाणां च उपरि विमर्शं प्रोत्साहयितुमस्ति।
सङ्गोष्ठ्याः रूपरेखां सज्जीकर्तुं संस्कृतविभागाध्यक्षस्य डॉ. कृष्णकान्तझामहोदयस्य अध्यक्षतायाम् एका उपवेशनगोष्ठी आयोजिता। अस्यां गोष्ठ्याम् संयोजकः डॉ. आर. एन. चौरसिया, डॉ. प्रभातदास-फाउण्डेशनस्य सचिवः मुकेशकुमारझा, दर्शनशास्त्रविभागाध्यक्षा डॉ. शिखरवासिनी, शोधार्थी प्रियङ्कासरकारः, कर्मचारिणी मञ्जू अकेला, योगेन्द्रपासवानः, उदयकुमारउदेशः इत्यादयः सदस्याः समुपस्थिताः आसन्।