निर्वाचनम् 2026: त्रिषु राज्येषु मतदानस्य कीर्तिमानम्, असमस्य इतिहासे प्रथमवारं 85.38 प्रतिशतं मतदानम्

निर्वाचनम् 2026: त्रिषु राज्येषु मतदानस्य कीर्तिमानम्, असमस्य इतिहासे प्रथमवारं 85.38 प्रतिशतं मतदानम्
देशस्य द्वयोः राज्ययोः असम-केरलयोः तथा च केन्द्रशासितप्रदेशे पुड्डुचेर्यां गुरुवासरे मतदानस्य सर्वे कीर्तिमानाः भग्नाः अभवन्। निर्वाचन-आयोगानुसारं रात्रौ अष्टवादनपर्यन्तं असमराज्ये 85.38 प्रतिशतं मतदानम् अभवत्। असमस्य इतिहासे एषः सर्वाधिकः मतदानस्य अङ्कः अस्ति। एवमेव केरले गतेषु 49 वर्षेषु द्वितीयं सर्वाधिकं मतदानम् अभवत्, अत्र 78.01 प्रतिशतं जनाः मतदानं कृतवन्तः। 1977 तमे वर्षे केरले सर्वाधिकं 79.2 प्रतिशतं मतदानम् अभवत्। अपरपक्षे पुड्डुचेर्यां 89.81 प्रतिशतं मतदानं जातम्।
मतदानकाले असमराज्ये निर्वाचनसम्बन्धिन्यां हिंसायां प्रायः 30 जनाः क्षताः अभवन्, सप्त जनाः च निगृहीताः (आरक्षिताः)। श्रीभूमिमण्डलस्य ‘पथारकण्डी’ स्थाने काङ्ग्रेस-भाजपा समर्थकानां मध्ये सङ्घर्षे प्रायः 25 जनाः क्षताः, द्वयोः अवस्था गभीरा अस्ति। पुड्डुचेर्याः ‘मन्नादिपेट’ क्षेत्रे मतदानकेन्द्रे काङ्ग्रेस-भाजपा समर्थकानां मध्ये कलहः अभवत्। आरक्षकैः समूहे दण्डप्रहारः (लाठीचार्ज) कृतः।
पुड्डुचेर्याः मुख्यमन्त्री रंगास्वामी मतदानार्थं द्विचकियावाहनेन मतदानकेन्द्रं प्राप्तवान्। केरले पूर्वप्रतिरक्षामन्त्री काङ्ग्रेसनेता च ए.के. एण्टनी महोदयः तिरुवनन्तपुरमे मतदानं कृतवान्। असमस्य मुख्यमन्त्री हिमन्ता बिस्व सरमा गुवाहाटी-नगरे मातुः कामाख्यायाः मन्दिरे पूजनं कृतवान्। ततः परं पत्न्या सह ‘जालुकबाड़ी’ क्षेत्रे मतदानं कृतवान्। एतेषां त्रयाणां राज्यानां निर्वाचनपरिणामाः मई-मासस्य चतुर्थे दिनाङ्के आगमिष्यन्ति।