क्युबा-देशे मानवीय-सङ्कटम्

क्युबा-देशे मानवीय-सङ्कटम्
संयुक्तराष्ट्रस्य एकेन प्रवक्त्रा कथितं यत् क्युबा-देशे इन्धनस्य अभावात् मानवीय-सङ्कटम् उत्पन्नम् अस्ति, तत्र च स्वास्थ्यव्यवस्था गम्भीरायां स्थितौ प्राप्ता। संयुक्तराष्ट्र-मानवीय-कार्य-समन्वय-कार्यालयेन (OCHA) उक्तं यत् चिकित्सालयेषु वारं वारं विद्युत्-अवरोधः, अत्यावश्यक-औषधीनां न्यूनता, महत्त्वपूर्ण-यन्त्राणां संचालने असमर्थता च वर्तते। अस्मात् कारणात् आपत्कालीन-सेवाः, शिशु-मातृ-रक्षणं, ‘कोल्ड-चेन’ प्रणाली, चिरकालिक-रोगाणां उपचारः च महता व्यधानेन प्रभाविताः सन्ति। रुग्णवाहिकानां (Ambulance) कृते अपि इन्धन-प्राप्तौ काठिन्यं भवति, येन आपत्कालीन-चिकित्सायां विलम्बः जायते।
अमेरिका-प्रशासनेन गतमासे घोषितं यत् तत् क्युबा-देशे किञ्चित् तैल-आपूर्तेः अनुमतिं ददाति, किन्तु एतत् केवलं निजी-क्षेत्रेभ्यः विक्रेतुं शक्यते, सर्वकाराय न। वाशिंगटन-नगरेण पूर्वं वेनेजुएला-देशात् क्युबा-देशं प्रति गच्छतः तैलस्य उपरि निर्बन्धः (Sanctions) आरोपितः आसीत्। संयुक्तराष्ट्रस्य प्रवक्त्रा उक्तं यत् एषा जागतिक-संस्था अमेरिकासहितैः सदस्यदेशैः सह चर्चां करोति, येन सहायता निर्बाधं प्राप्तुं शक्येत।