नूतनराज्यपालस्य शपथग्रहणम्; केन्द्रसर्वकारेण कविन्द्रगुप्तः हिमाचलस्य राज्यपालपदे नियुक्तः

नूतनराज्यपालस्य शपथग्रहणम्; केन्द्रसर्वकारेण कविन्द्रगुप्तः हिमाचलस्य राज्यपालपदे नियुक्तः
हिमाचलप्रदेशस्य नवनियुक्तः राज्यपालः कविन्द्रगुप्तः मार्च-मासस्य दशमे (१०) दिनाङ्के पदस्य गोपनीयतायाश्च शपथं ग्रहीष्यति। ‘लोकभवनम्’ इति स्थाने अयं समारोहः भविष्यति, यत्र हिमाचलप्रदेश-उच्चन्यायालयस्य मुख्यन्यायाधीशः तस्मै शपथं कारयिष्यति। सः हिमाचलस्य त्रिंशत्तमः (३०) राज्यपालः भविष्यति।लोकभवने शपथग्रहणसमारोहस्य सज्जताः आरब्धाः सन्ति। हिमाचलस्य नूतनराज्यपालः कविन्द्रगुप्तः सोमवासरे राजधानीं शिमलां सम्प्राप्स्यति। तस्य स्वागतार्थं सोमवासरे सायं सार्धषड्वादने (६:३०) लोकभवने कश्चित् कार्यक्रमः आयोजितः अस्ति, यस्मिन् मुख्यमन्त्री सुखविन्दरसिंहसुक्खु महोदयः, तस्य मन्त्रिमण्डलस्य सदस्याः, सेना-आरक्षकदलस्य प्रमुखाः, मुख्यसचिवः तथा च प्रशासकीय-अधिकारिणः उपस्थिताः भविष्यन्ति। एतदतिरिच्य भाजपा-नेतारः अपि स्वागतसमारोहे सम्मिलिताः भविष्यन्ति।
अस्मात् पूर्वं सोमवासरे लोकभवने वर्तमानराज्यपालस्य शिवप्रतापशुक्लस्य विदाई-समारोहः (विदाई-उत्सवः) अपि आयोज्यते। उल्लेखनीयं यत् केन्द्रसर्वकारेण सद्यः एव केचन राज्यपालाः परिवर्तिताः। शिवप्रतापशुक्लः तेलङ्गाना-राज्यस्य राज्यपालत्वेन नियुक्तः, लद्दाखस्य उपराज्यपालपदात् त्यागपत्रं दत्त्वा कविन्द्रगुप्तः हिमाचलस्य नूतनराज्यपालत्वेन नियुक्तः अस्ति।