केन्द्रीय-संस्कृत-विश्वविद्यालयस्य कुलपतिः प्रो. श्रीनिवासवरखेड़ी ‘संस्कृतात्मा-पुरस्कारेण’ सम्मानितः

केन्द्रीय-संस्कृत-विश्वविद्यालयस्य कुलपतिः प्रो. श्रीनिवासवरखेड़ी ‘संस्कृतात्मा-पुरस्कारेण’ सम्मानितः
हिमसंस्कृतवार्ता:- डॉ रेणुका बोकारे, संगमनेरम् (महाराष्ट्रम्)।
शिक्षण- प्रसारक- संस्थायाः संगमनेर- महाविद्यालयेन ‘श्री ओंकारनाथ- मालपाणी- संस्कृत- संशोधन- केन्द्रस्य’ ‘श्री जगन्नाथ- नरसिंगदास- कलन्त्री- क्रीडाभवने’ ‘संस्कृतात्मा- सम्मानसमारोहः २०२५-२६’ आयोजितः। अस्मिन् समारोहे केन्द्रीय- संस्कृत- विश्वविद्यालयस्य (नवदेहली) कुलपतये प्रो. श्रीनिवास- वरखेड़ी- महोदयाय प्रतिष्ठितः ‘संस्कृतात्मापुरस्कारः २०२५-२६’ प्रदत्तः।
प्रो. श्रीनिवास- वरखेड़ी- महोदयाय तस्य संस्कृतसेवायै सम्मानस्वरूपं ₹५१,००० (एकपञ्चाशत्- सहस्रम्) रूप्यकाणां धनराशिः, प्रशस्तिपत्रं, स्मृतिचिह्नम्, उत्तरीयं, श्रीफलं च प्रदाय सम्मानितं कृतम्। अस्मिन् कार्यक्रमे ‘मालपाणी- परिवार- चैरिटेबल- ट्रस्ट’ इत्यस्य ललितादेवी मालपाणी महोदयायाः गरिमामयी उपस्थितिः आसीत्। समारोहे संस्थायाः कार्याध्यक्षः डॉ. संजय मालपाणी, प्राचार्यः डॉ. अरुण गायकवाडः, संस्कृतविभागाध्यक्षः डॉ. अनिरुद्ध मण्डलिकः च सह बहुसङ्ख्याकाः प्राध्यापकाः, शोधार्थिनः छात्राश्च उपस्थिताः आसन्।
पुरस्कारग्रहणानन्तरं प्रो. श्रीनिवास- वरखेड़ी- महोदयः स्वकीय-उद्बोधने अवदत् यत् “संस्कृतं केवलम् एका भाषा न, अपि तु भारतीयसंस्कृतेः उन्नत- ज्ञान- विज्ञानस्य च आधारशिला वर्तते। आधुनिक-तन्त्रज्ञानस्य परम्परायाः च समन्वयेन एतां नूतनसततिं यावत् प्रापणं अस्माकं सामूहिकं दायित्वं वर्तते।” प्रो. वरखेड़ी-महोदयाय इदं सम्मानं संस्कृतस्य प्रचारप्रसाराय, भारतीय- ज्ञान- परम्परायाः संरक्षणे तस्य वैश्विक-योगदानाय प्रदत्तः अस्ति।