“महाकविकालिदास-संस्कृतव्रती राष्ट्रियपुरस्कारस्य” घोषणा कृता

कविकुलगुरुकालिदाससंस्कृतविश्वविद्यालयेन “महाकविकालिदास-संस्कृतव्रती राष्ट्रियपुरस्कारस्य” घोषणा कृता
हिमसंस्कृतवार्ता: – डॉ रेणुका बोकारे, नागपुरम्।
कविकुलगुरुकालिदाससंस्कृतविश्वविद्यालयः, पण्डितरामनारायणशर्मावैद्यस्य स्मृतौ पण्डितरामनारायणशर्मा आयुर्वेद-अनुसन्धानप्रतिष्ठानेन, स्थानीयजनपदप्रशासनेन तथा च महाराष्ट्रपर्यटनविकासमण्डलेन (नागपुरम्) सह मिलित्वा प्रतिवर्षं “महाकविकालिदास- संस्कृतव्रती-राष्ट्रिय-पुरस्कारम्” प्रददाति।अस्य पुरस्कारस्य मुख्योद्देश्यं तेषां विदुषां सम्माननं वर्तते ये संस्कृतभाषायाः प्रचाराय, प्रसाराय, विकासाय, अनुसन्धानाय च स्वजीवनं समर्पितवन्तः। विश्वविद्यालयः एतान् महानुभावान् पुरस्कृतं करोति ये संस्कृतभाषां समाजे गौरवान्वितस्थानं दापयितुं अमूल्यं योगदानं दत्तवन्तः। विश्वविद्यालयेन सम्प्रति वर्ष २०२४ तथा २०२५ कृते पुरस्काराणां घोषणा कृता। एते पुरस्काराः तिसृषु श्रेणीषु दीयन्ते: अन्ताराष्ट्रियसंस्कृतविद्वान्, वरिष्ठसंस्कृतविद्वान् तथा युवासंस्कृतविद्वान् च। अयं निर्णयः माननीयकुलगुरुणा प्रो. हरेरामत्रिपाठिमहोदयेन आहूतायां पुरस्कारचयनसमित्याः उपवेशने स्वीकृतः।
पुरस्कारविजेतृणां विवरणम् (२०२४-२०२५)
१. अन्ताराष्ट्रियसंस्कृतविद्वच्छ्रेणी:
२०२४: प्रो. सरोजा भाटे, पुणे (प्रज्ञापाठशालायाः अध्यक्षा, संस्कृतव्याकरणविदुषी)।
२०२५: प्रो. माधव देशपाण्डे, अमेरिका (मिशिगनविश्वविद्यालयस्य पूर्वप्रोफेसरः, व्याकरण-भाषाविज्ञानविशेषज्ञः)।
२. वरिष्ठसंस्कृतविद्वच्छ्रेणी:
२०२४: प्रो. कालुरी हनुमन्त राव, सिकन्दराबाद (प्रसिद्धसंस्कृतविद्वान्)।
२०२५: प्रो. कृष्णकान्त शर्मा, वाराणसी (काशीहिन्दूविश्वविद्यालयस्य पूर्वप्रोफेसरः, भारतीयदर्शनविशेषज्ञः)।
३. युवासंस्कृतविद्वच्छ्रेणी:
२०२४: प्रो. वीरनारायण पाण्डुरङ्गी, बेङ्गळूरु (वैदिकभाष्यकारः, पूर्णप्रज्ञापाठशालायाः निदेशकः)।
२०२५: डॉ. सचिन कठाले, नागपुरम् (कोलकसन्देशस्य सहसम्पादकः, संस्कृतप्रचारकः)।
पुरस्कारस्य स्वरूपम्
अस्य पुरस्कारस्य अन्तर्गतं वरिष्ठ-अन्ताराष्ट्रियविद्वद्भ्यः ५०,००० रूप्यकाणां राशिः, युवाविद्वद्भ्यः च २५,००० रूप्यकाणां राशिः प्रदीयते। एतेन सह प्रशस्तिपत्रं, अङ्गवस्त्रं, श्रीफलं च समर्प्यते। एकस्मिन् विशेषकार्यक्रमे एते सर्वे विद्वांसः सम्मानिताः भविष्यन्ति।कुलगुरुः डॉ. अतुल वैद्यः तथा कुलसचिवः डॉ. रोशन अलोने सर्वेषां पुरस्कृतविदुषां अभिनन्दनं कृतवन्तौ।