उत्तराखण्डे मेघ-विस्फोट-प्रभाविते उत्तरकाशी धरालीति क्षेत्रे रक्षोद्धार-कार्यं युद्धस्तरे

उत्तराखण्डे मेघ-विस्फोट-प्रभाविते उत्तरकाशी जनपदस्य धरालीति क्षेत्रे रक्षोद्धार-कार्यं युद्धस्तरे प्रवर्ततेतराम्
हिमसंस्कृतवार्ता: – उत्तराखण्डे जनानां रक्षोद्धार-कार्यं प्रवर्ततेतराम्। खीर-गङ्गा-नद्यां मेघ-विस्फोट-कारणेन दुरापन्नस्य प्रलयङ्करस्य तोयप्लवस्य अनन्तरम् उत्तरकाशी जनपदस्य धरालीति क्षेत्रे युद्धस्तरे रक्षोद्धार-कार्यं प्रवर्ततेतराम्। सैन्यबलम् राष्ट्रिय-आपदा-मोचनबलं, राज्य-आपदा-मोचनबलं, जनपद-प्रशासनम्, अन्यानि च उद्धारदलानि निरन्तरं कार्यरतानि सन्ति। अत्रान्तरे, मुख्यमन्त्री पुष्कर-सिंह-धामी आपदा-प्रभावित-क्षेत्राणां जनैः साकं संभाषणं कृत्वा तेषां कुशलक्षेमं ज्ञातवान्। सहैव आपदा-प्रभावित-परिवारेभ्यः सर्व-सम्भव-सहायता-प्रदानमपि आश्वासितवान्। सहैव उत्तरकाशी-स्थिते आपदा-नियन्त्रण-कक्षे जनोद्धार-सुरक्षा-कार्याणां विस्तृत-समीक्षामपि व्यदधात्। असौ तत्र सुरक्षोद्धार-कार्येषु नियुक्तैः कार्मिकैः साकमपि सम्भाषणम् आचरितवान्। मुख्यमंत्री प्रावोचत् यत् राज्य-सर्वकारस्य सर्वोच्च-प्राथमिकता इदं सुनिश्चितीकरणम् अस्ति यत् सर्वेभ्यः प्रभावितेभ्यः जनेभ्यः उद्धार-साहाय्यं शीघ्रमेव प्राप्तम्भवेत्। अथ च शीघ्राति-शीघ्रं सामान्य-स्थितिः प्रवर्तिता भवेत्। अनेन प्रशासनं निर्दिष्टम् अस्ति यत् कश्चिदपि प्रभावितः परिवारः सहायताभिः वंचितः न भवेत्। मुख्यमन्त्री प्रावोचत् यत् सैन्यबलेन प्रायः नवत्युत्तर-एक-शतं जनाः उद्धार-पूर्वकं सुरक्षित-स्थानेषु प्रापिताः सन्ति। प्रधानमन्त्री श्रीनरेन्द्रमोदी अपि विधीयमानानां जनोद्धार-प्रयासानां विषये मुख्यमन्त्रिणा धामि-वर्येण समं दौरभाषिकं सम्भाषणम् आचरितवान्। अथ च केन्द्र-सर्वकार-सर्वसम्भव-सहायता-प्रदानमपि आश्वासितवान्। अत्रान्तरे, ऋतु-विज्ञानविभागेन उत्तराखंडे, हिमाचल-प्रदेशे, उत्तर-प्रदेशे, केरले च प्रचंड-वृष्टेः सुरक्षा-संचेतना प्रख्यापितास्ति । आगामि-दिनेषु समस्ते राज्ये आनारतम् अतिवृष्टेः अनुमानं कृतम् अस्ति।