भारत-अंगोलादेशौ कृषि-पारम्परिक-चिकित्सा-संस्कृतिसहितेषु विविधक्षेत्रेषु आदान-प्रदानं विहितवन्तौ

भारत-अंगोलादेशौ कृषि-पारम्परिक-चिकित्सा-संस्कृतिसहितेषु विविधक्षेत्रेषु आदान-प्रदानं विहितवन्तौ
हिमसंस्कृतवार्ता: – भारत-अंगोलादेशौ कृषि-पारम्परिक-चिकित्सा-संस्कृतिसहितेषु विविधक्षेत्रेषु आदान-प्रदानं विहितवन्तौ। प्रधानमन्त्री नरेन्द्रमोदी एवं अंगोलायाः राष्ट्रपतिः जोआओ मैनुअल गोंकाल्वेस लौरेंको इत्यनयोः मध्ये नवदेहल्यां प्रतिनिधिमण्डल-स्तरीय-वार्तायाः एताः सन्धयः समभवन्। प्रधानमन्त्रिणा मोदिना प्रोक्तं यत् भारतदेशः आतङ्कवादीनां तेषां समर्थकानाञ्च प्रतिकारार्थं प्रतिबद्धोऽस्ति । प्रधानमन्त्रिणा अवसरेऽस्मिन् अंगोलादेशस्य सेनायाः आधुनिकीकरणार्थ द्विशत-मिलियन डालरमितात्मिकायै रक्षा-ऋण-सहायतायै अपि सहमतिः प्रकटिता। मोदिना प्रोदीरितं यत् भारत-अंगोलादेशौ वर्षेऽस्मिन् स्वकीय-राजनयिक-सम्बन्धानां चत्वारिंशत्तमाम् वर्षपूर्ति समाचरतः। तेन अफ्रीकी-संघस्य अध्यक्षतायै अंगोलादेशाय स्वकीयाः शुभकामनाः प्रकल्पिताः। तेनोक्तं यत् भारतदेशाय अयं गर्वस्य विषयः यत् भारतस्य जी-विंशतिः अध्यक्षतायामेव अफ्रीकी-संघेन जी-विंशत्यां स्थायी सदस्यता सम्प्राप्ता। प्रधानमन्त्रिणा सबलं प्रोदीरितं यत् भारत-अफ्रीकीसङ्घौ प्रगत्यां सहभागिनौ वर्त्तते सहैव वैश्विकदक्षिणस्य कीर्तिस्तम्भावपि स्तः। अवधेयं वर्त्तते यत् अंगोलायाः राष्ट्रपतिः त्रिदिवसीय-राजकीय-भारतयात्रायै नवदेहलीं सम्प्राप्तवान्। तेन सह उच्चस्तरीय प्रतिनिधिमण्डलमपि समागतः, यस्मिन् नैके मन्त्रिणः, वरिष्ठाधिकारिणः, व्यापारिणः वार्ताहराश्च सम्मिलितास्सन्ति। अंगोलादेशस्य राष्ट्रपति-लौरेंको इत्येतस्य राष्ट्रिय-राजधान्यां राष्ट्रपतिभवनस्य प्राङ्गणे औपचारिकं स्वागतं समभवत्। राष्ट्रपतिः द्रौपदी-मुर्मुः प्रधानमन्त्री नरेन्द्र मोदी च अंगोला-राष्ट्रपतेः स्वागतं कृतवन्तौ । वार्ताहरैस्सह संवादक्रमे राष्ट्रपतिः लौरेंको इत्येषः प्रोक्तवान् यत् अष्टत्रिंशत्-वर्षेषु इयं प्रथमा राजकीय-यात्रा वर्तते अंगोलायाः कृते अयं महत्वपूर्ण-क्षणः वर्तते। अवसरेऽस्मिन् वार्ताहरान् सम्बोधयन् विदेशमन्त्रालयस्य सचिवः दम्मू रविः विज्ञापितवान् यत् अंगोलादेशः भारतात् रक्षोपकरणानि क्रेष्यति ।