जम्मू-कश्मीरे रामबन-मण्डलस्य सेरी-बागना-क्षेत्रे मेघ-स्फोटनेन न्यूनातिन्यूनं त्रयः जनाः मृत्युमुपगताः

जम्मू-कश्मीरे रामबन-मण्डलस्य सेरी-बागना-क्षेत्रे मेघ-स्फोटनेन न्यूनातिन्यूनं त्रयः जनाः मृत्युमुपगताः
हिमसंस्कृतवार्ता: – जम्मू-कश्मीरे रामबन-मण्डलस्य सेरी-बागना-क्षेत्रे मेघ-स्फोटनेन न्यूनातिन्यूनं त्रयः जनाः मृत्युमुपगताः। प्राप्तवार्तानुसारं रामबन-क्षेत्रे शनिवाररात्रौ तीव्र-हिमपातः, बहुविधं भूस्खलनं, तीव्र-वायुः प्रवाहः च अभवन् । रविवासरे प्रातःकाले मण्डलस्य धरमकुण्डग्रामे प्रचण्डवृष्ट्या जलप्लावेन प्रायः शताधिकाः जनाः उद्घारिताः। क्षेत्रे प्रतिकूल-ऋतोः कारणेन ग्रामे चत्वारिंशत् आवासगृहाणि क्षतिग्रस्तानि अभवन् । उपायुक्तेन बसीर-उल-हक चौधरी इत्यनेन उक्तं यत् नदीनां जलस्रोतानाम् अतिप्रवाहस्य कारणेन जलाप्लवेन अनेकानि वाहनानि प्रवहितानि। रामबनमण्डल-प्रशासनेन जिला-नियन्त्रण-कक्षस्य आपाकालीना दूरभाषसंख्यापि प्रसारिता संख्या अस्ति – शून्यम्, एकम्, नव, नव, अष्ट द्वे, नव, पञ्च, पञ्च, शून्यम्, शून्यम् अपरः च शून्यम्, एकं, नव, नव, अष्ट- द्वे, षड्, षड्, सप्त, नव, शून्यम् इति । तत्रैव केन्द्रीयमन्त्री डॉ जितेन्द्रसिंहः जम्मू-कश्मीरस्य मुख्यमन्त्री उमर अब्दुल्ला च अस्यां घटनायां प्राणहानिविषये दुःखं प्रकटितवन्तौ। केन्द्रीयमन्त्री सामाजिकान्तर्जालीये संदेशे अवदत्, सः मण्डलस्य उपायुक्तेन सह नित्यं सम्पर्के अस्ति। सः अवदत् यत् आर्थिकादिकं सर्वविधं सहायताः प्रदत्ताः भविष्यन्ति। जम्मू-कश्मीरस्य मुख्यमन्त्री घटनास्थले गत्वा जीर्णोद्धारस्य, उद्धारस्य, च कार्याणां समीक्षां कृतवान् ।