भारतीयसंस्कृतपरम्पराः आधुनिकसमाजस्य नैतिकबौद्धिकविकासस्य च आधारशिला

भारतीयसंस्कृतपरम्पराः आधुनिकसमाजस्य नैतिकबौद्धिकविकासस्य च आधारशिला
विभागाध्यक्षा समन्वयिका च प्रो. कुसुमडोबरियालवर्या, संयोजक: डॉ. दिनेशकृष्णपाण्डेय: इत्यनयो: द्वयो: च कुशलनेतृत्वे द्विदिवसीया संगोष्ठी सफलतया सुसम्पन्ना।
वार्ताहर:- कुलदीप मैन्दोला, पौडी।
हेमवतीनन्दनबहुगुणा- गढ़वालविश्वविद्यालयस्य संस्कृतविभागेन पौड़ीपरिसरे द्विदिवसीया राष्ट्रीयसंगोष्ठी आयोजिता। संगोष्ठ्याः शुभारम्भः उद्घाटनसत्रेण अभवत्, यत्र अध्यक्षता प्रो. यू. सी. गैरोला (परिसरनिदेशकः, डॉ. बी. जी. आर. परिसरः, पौड़ी) इत्यनेन कृत:। कार्यक्रमस्य संयोजकेन डॉ. दिनेशकृष्णपाण्डेयेन समस्तानाम् अतिथीनां प्रतिभागिनां च सादरं स्वागतं कृतम्।
संगोष्ठ्याः प्रारम्भे शोधछात्र-छात्राभिः सरस्वतीवन्दना स्वागतगीतं च प्रस्तुतम्, येन वातावरणे आध्यात्मिकं विद्वत्संयुक्तं च ओजः संचारितम्। तत्पश्चात् विभागाध्यक्षया समन्वयिकया च प्रो. कुसुमडोबरियालमहोदयया अतिथीनां स्वागतं कृत्वा संगोष्ठ्याः उद्देश्यं महत्वं च प्रतिपादितम्।
मुख्यबिन्दवः
1. विशिष्टातिथिः प्रो. पी. पी. बड़ोनीमहोदयः भारतीयसंस्कृतेः महत्त्वं तस्याः अद्यतनप्रासङ्गिकत्वं च विवेचितवान्।
2. सम्मानितातिथिः प्रो. अनूप के. डोबरियालमहोदयः भारतीयसंस्कृतेः गुरुशिष्यपरम्परा, वाणीशालीनता, सहिष्णुता, सत्यं, अहिंसा, करुणा, सेवाभाव: इत्येतेषां मूल्यविशेषाणां महत्त्वं प्रतिपादितवान्।
3. मुख्यातिथिः प्रो. पी. वी. वी. सुब्रह्मण्यममहोदय: (निदेशकः, केन्द्रीयसंस्कृतविश्वविद्यालय- रघुनाथकीर्तिपरिसर: देवप्रयागत:) प्राचीनभारतीय- संस्कृतेः संरक्षणे उत्थाने च सारगर्भितं व्याख्यानं दत्तवान्।
4. अध्यक्षीयसंबोधनम् – प्रो. यू. सी. गैरोलामहोदयः भारतीयसंस्कृतेः वर्तमानसमाजे प्रासङ्गिकत्वं विवेचितवान् तथा संगोष्ठ्याः सफलतायाः शुभकामनां दत्तवान्।
तकनीकीसत्रे-
उद्घाटनसत्रानन्तरं द्वे तकनीकीसत्रे आयोजिते, यस्मिन् विषयविशेषज्ञाः स्वविचारान् प्रस्तुतवन्तः—
1. डॉ. सच्चिदानन्द स्नेही (केन्द्रीय- संस्कृत- विश्वविद्यालय- रघुनाथकीर्तिपरिसरदेवप्रयागत:) महोदयः भारतीयदर्शने निहिते नैतिकमूल्ये विशेषव्याख्यानं दत्तवान्।
2. डॉ. जनार्दनसुवेदी (केन्द्रीय- संस्कृत- विश्वविद्यालय- रघुनाथकीर्तिपरिसर- देवप्रयागत:) महोदयः सत्यज्ञानयोः सिद्धान्तं विस्तरेण प्रतिपादितवान्।
तत्पश्चात् शोधछात्रैः भारतीयसंस्कृतेः मौलिकमूल्येषु राष्ट्रनिर्माणे च तेषां प्रासङ्गिकत्वे शोधपत्राणि प्रस्तुतानि। सर्वेषां विद्वत्संवादेन संगोष्ठ्याः प्रथमदिवसः अतीव ज्ञानवर्धकः प्रभावशाली च अभवत्।
द्वितीयदिवसस्य सफलसमापनम्-
द्वितीयदिवसेऽपि सारगर्भितेऽस्मिन् अकादमिकविमर्शे विद्वांस: शोधार्थिनः च सक्रियतया भागं गृहीतवन्तः।
तकनीकीसत्रे-
द्वितीयदिवसस्य आरम्भे अपि द्वे तकनीकीसत्रे आयोजिते, यत्र शोधपत्राणि वाचितानि। तत्र भारतीयसंस्कृतेः मौलिकमूल्येषु, तेषां प्रासङ्गिकत्वे, राष्ट्रनिर्माणे च तेषां भूमिकायां गभीरचर्चा कृता।
समापनसत्रम्-
समापनसत्रे अध्यक्षाः अतिथयश्च संगोष्ठ्याः प्रमुखनिष्कर्षान् प्रतिपादितवन्तः। संगोष्ठ्याः निष्कर्षेषु प्रतिपादितं यत्-
“भारतीय- संस्कृत- परम्पराः केवलं अतीतानां धरोहरः न, अपि तु आधुनिकसमाजस्य नैतिकबौद्धिकविकासस्य आधारशिला अस्ति।” समापनसमये आयोजकैः सर्वेषाम् अतिथीनां, शोधार्थिनां, सहभागिनां च कृतज्ञता व्यक्ता। सर्वे सहभागिनः संस्कृतविभागं (हेमवतीनन्दनबहुगुणा- गढ़वालविश्वविद्यालय) प्रति सफलसंयोजनाय अभिनन्द्य भविष्येऽपि एवं विद्वत्संगोष्ठीनां आयोजनस्य आशां प्रकटितवन्त:।