वाणिज्यमन्त्री पीयूषगोयलः जर्मनेः हेस्सेन-राज्यस्य मन्त्रिभ्यां बोरिस-राइन-मैनफ्रेड-पेन्ट्ज़-महाभागाभ्यां सह अमिलत्

वाणिज्यमन्त्री पीयूषगोयलः जर्मनेः हेस्सेन-राज्यस्य मन्त्रिभ्यां बोरिस-राइन-मैनफ्रेड-पेन्ट्ज़-महाभागाभ्यां सह अमिलत्
केन्द्रीय-वाणिज्य-उद्योगमन्त्री पीयूषगोयलः जर्मनीदेशस्य हेस्सेन-राज्यस्य मन्त्रिणा बोरिस-राइनेन तथा सङ्घीय-यूरोपीय-विषयाणां, सार्वाङ्गिक-प्रशासनिक-परिष्काराणां च मन्त्रिणा मैनफ्रेड-पेन्ट्जेन सह मेलनं कृतवान्। अस्मिन् उपवेशने जर्मनेः प्रमुखोद्योगानां प्रतिनिधिमण्डलमपि भागम् अगृह्णात्। श्रीगोयलः सामाजिक-माध्यम-सन्देशे प्रावोचत् यत् सम्भाषणकाले उभौ पक्षौ एआई (कृत्रिमबुद्धिः), स्वच्छोर्जा, अनुसन्धान-विकासौ, दत्तांश-केन्द्रम् (डेटा सेण्टर्), भेषजम् (फार्मा), रसायनम्, उत्पादनम्, फिनटेक्, दीप-टेक् तथा कौशलविकासस्य क्षेत्रेषु सहकारस्य नूतन-सम्भावनासु चर्चाम् अकुरुताम्। सः अकथयत् यत् भारत-हेस्सेनयोः मध्ये दृढं परस्पर-सहयोगं वर्धयन् भारतम् वाणिज्य-प्रौद्योगिकी-निवेश-नवीनोन्मेष-क्षेत्रेषु सहभागितां सुदृढां कर्तुं भारत-यूरोपीयसङ्घ-मुक्तव्यापार-अनुबन्धेन प्राप्तानां नूतनावसराणां लाभं स्वीकर्तुं सज्जम् अस्ति।