कृषिमन्त्री शिवराजसिंहचौहानः उभयोः मन्त्रालययोः अधिकारिभ्यः कर्मचारिभ्यश्च ‘शक्तेः सप्तधारा’-शपथम् अकारयत्

कृषिमन्त्री शिवराजसिंहचौहानः उभयोः मन्त्रालययोः अधिकारिभ्यः कर्मचारिभ्यश्च ‘शक्तेः सप्तधारा’-शपथम् अकारयत्
कृषि-तथा-कृषककल्याण-ग्रामीणविकासमन्त्री शिवराजसिंहचौहानः नवदेहल्याम् उभयोः मन्त्रालययोः अधिकारिभ्यः कर्मचारिभ्यश्च ‘शक्तेः सप्तधारा’-शपथम् अकारयत्। अस्मिन् अवसरे कृषि-कृषककल्याण-राज्यमन्त्री भागीरथचौधरी तथा ग्रामीणविकास-राज्यमन्त्री डॉ. चन्द्रशेखरपेम्मासानी अपि उपस्थितौ आस्ताम्। श्रीचौहानः अवदत् यत् प्रधानमन्त्री नरेन्द्रमोदी शक्तेः सप्तधारा-माध्यमेन विकसितभारतस्य निर्माणाय स्पष्टं मार्गचित्रं (रोडमैप) दत्तवान्। सः अधिकारिणः कर्मचारिणश्च स्वविभागानां कृते स्पष्टलक्ष्यं निर्धारयितुं तत् प्राप्तुं च दृढां कार्ययोजनां निर्मातुम् आहूतवान्। सः अकथयत् यत् देशेन कृषि-उत्पादनवर्धनस्य सममेव तस्य गुणवत्तायामपि ध्यानं दातव्यम्, येन भारतीयकृषकाणाम् उत्पादाः अन्ताराष्ट्रियविपण्यां दृढां प्रतिष्ठां लभेरन्। सः प्रावोचत् यत् भारतीयकृषेः वैश्विकविपण्या सह संयोजनं समयस्य आवश्यकता अस्ति। श्रीचौहानः अवदत् यत् ग्रामीणविकासाय तिस्रः कोटिः ग्रामीणमहिलाः ‘लखपति दीदी’ विधातुं लक्ष्यं सम्प्राप्तम्। अधुना षट्कोटि (६ कोटि) ‘लखपति दीदी’ निर्माणस्य लक्ष्यं वर्तते। सः अकथयत् यत् विकसितानां ग्रामाणां विना विकसितभारतस्य स्वप्नः पूर्णः भवितुं नार्हति। श्रीचौहानः जलसुरक्षायाः, नदीनां पुनरुज्जीवनस्य, भूमिसम्पदां संरक्षणस्य ग्रामीणोपजीविका-सम्बद्धानां कार्यक्रमानां च त्वरितगत्या सञ्चालने बलं दत्तवान्।