“HTET-परीक्षायां संस्कृतविभागस्य विद्यार्थिनां भव्यसफलता”

“HTET-परीक्षायां संस्कृतविभागस्य विद्यार्थिनां भव्यसफलता”
हरियाणा-केन्द्रीय-विश्वविद्यालयस्य संस्कृतविभागेन पुनरेकवारं स्वकीयायाः शैक्षणिक-उत्कृष्टतायाः प्रमाणं प्रदर्शितम्। विभागस्य चतुर्दश प्रतिभाशालिनः विद्यार्थिनः प्रतिष्ठितायां हरियाणा-शिक्षक-पात्रता-परीक्षायां (HTET) उल्लेखनीयां सफलतां प्राप्य स्वविभागस्य विश्वविद्यालयस्य च गौरवं वर्धितवन्तः। एतेषु विद्यार्थिषु विजयपालः, चोखराजः, ज्योतिः, ज्योतिर्यादवः, रचना, चेतनश्च केवलं TGT-वर्गे सफलतां प्राप्तवन्तः। रितु, सपना, तन्नू, मनीषा च TGT-PGT चेत्युभययोः वर्गयोः सफलतां प्राप्तवत्यः। विश्वविद्यालयस्य माननीयः कुलपतिः प्रो. टङ्केश्वरकुमारः सर्वेभ्यः सफलविद्यार्थिभ्यः अस्याः उल्लेखनीयायाः सफलतायाः कृते हार्दिकं अभिनन्दनं व्याजहार। सः स्वसन्देशे अवदत्— “एषा सफलता अस्माकं विद्यार्थीनां निरन्तरप्रयत्नस्य समर्पणस्य च शिक्षकाणां श्रेष्ठमार्गदर्शनस्यापि परिणामः अस्ति। अहं पूर्णतया विश्वसिमि यत् एते प्रतिभाशालिनः विद्यार्थिनः भविष्ये श्रेष्ठशिक्षकरूपेण राष्ट्रस्य समाजस्य च निर्माणे स्वमूल्यवान् योगदानं प्रदास्यन्ति।” संस्कृतविभागस्य विभागाध्यक्षा प्रो. पायल-कँवर-चन्देल-महोदया अपि सफलानां छात्राणां शुभकामनाः प्रदाय तेषां कठिनपरिश्रमस्य प्रशंसां कृतवती। सा प्रसन्नतां प्रकटयन्ती अवदत्— “अस्माकं विद्यार्थिभिः HTET-सदृश्यायां कठिनपरीक्षायां उत्कृष्टं प्रदर्शनं कृत्वा न केवलं स्वीयं, अपितु सम्पूर्णस्य संस्कृतविभागस्यापि गौरवं वर्धितम्। एषा सफलता विभागस्य अन्येषां विद्यार्थिनामपि कृते महती प्रेरणा अस्ति।” विभागीयाः शिक्षकाः डॉ. सुमनरानी, डॉ. देवेन्द्रसिंहराजपूतः, डॉ. सुमितशर्मा, डॉ. कृष्णकुमारः, डॉ. अर्चनाकुमारी च सफलविद्यार्थिभ्यः अस्याः उपलब्धेः कृते हार्दिकान् शुभकामनाः प्रदत्तवन्तः तथा तेषां उज्ज्वलभविष्यस्य कामनां कृतवन्तः। एषा सफलता न केवलम् एतेषां विद्यार्थिनां उज्ज्वलभविष्यस्य सुदृढं आधारं निर्माति, अपितु हरियाणा-केन्द्रीय-विश्वविद्यालयस्य संस्कृतविभागे प्रदीयमानायाः उच्चस्तरीयशिक्षायाः, उत्कृष्टाध्यापनस्य तथा कुशलमार्गदर्शनस्य च परिचायकत्वेन अपि तिष्ठति। सम्पूर्णस्य विश्वविद्यालयपरिवारस्य पक्षतः सर्वेभ्यः भावीशिक्षकेभ्यः तेषां स्वर्णिमभविष्याय अनन्ताः हार्दिकाः शुभकामनाः।